കല്പറ്റ: ചൂരല്മല, മുണ്ടക്കൈ പ്രദേശത്തുണ്ടായ ഉരുള്പൊട്ടലില് മരിച്ച 36 പേരെ ഡി.എന്.എ പരിശോധനയിലൂടെ തിരിച്ചറിഞ്ഞു. 17 മൃതദേഹങ്ങളും 56 ശരീര ഭാഗങ്ങളുമുള്പ്പെടെ 73 സാമ്പിളുകളാണ് ബന്ധുക്കളില് നിന്ന് ശഖരിച്ച ഡി.എന്.എ സാമ്പിളുമായി യോജിച്ചത്. ഒരാളുടെ തന്നെ ഒന്നിലധികം ശരീര ഭാഗങ്ങള് ലഭിച്ചതായി പരിശോധനയില് സ്ഥിരീകരിച്ചിട്ടുണ്ട്. കണ്ണൂര് ഫോന്സിക് സയന്സ് ലാബോട്ടറിയിലാണ് പരിശോധനകള് നടത്തിയത്.
ഉരുള് പൊട്ടല് ദുരന്തത്തെത്തുടര്ന്ന് അവകാശികളില്ലാത്ത മൃതദേഹങ്ങള്/ശരീര ഭാഗങ്ങള് സംസ്കരിക്കുന്നതിനായുള്ള ഡി.എന്.എ പരിശോധനയ്ക്കു സാമ്പിളുകള് ശേഖരിക്കുന്നതിന് പാലിക്കേണ്ട പ്രോട്ടോക്കോള് സംബന്ധിച്ച് സര്ക്കാര് വ്യക്തമായ ഉത്തരവ് പുറപ്പെടുവിച്ചിരുന്നു. ഇതിന്റെ അടിസ്ഥാനത്തിലാണ് നടപടിക്രമങ്ങള് പൂര്ത്തികരിച്ചത്. പ്രത്യേക തിരിച്ചറിയല് നമ്പര് നല്കിയാണ് അവകാശികളില്ലാത്ത മൃതദേഹങ്ങളും ശരീര ഭാഗങ്ങളും സംസ്കരിച്ചത്. ഡി.എന്.എ ഫലങ്ങളുടെ അടിസ്ഥാനത്തില് 36 പേരെ തിരിച്ചറിഞ്ഞതിന്റെ ഭാഗമായി അവരുടെ വിലാസവും മറ്റ് വിശദാംശങ്ങളും കൃത്യമായി ശേഖരിക്കുകയും ചെയ്തിട്ടുണ്ട്.
ഡി.എന്.എ പരിശോധയില് തിരിച്ചറിഞ്ഞ മൃതദേഹങ്ങളും ശരീര ഭാഗങ്ങളും ലഭിക്കുന്നതിനുള്ള അപേക്ഷ അവകാശികള് സബ് ഡിവിഷണല് മജിസ്ട്രേറ്റ് കൂടിയായ മാനന്തവാടി സബ് കലക്ടര്ക്ക് (ഫോണ് 04935 240222) നല്കിയാല് അവ പുറത്തെടുക്കുന്നതിനും കൈമാറുന്നതിനും സബ് ഡിവിഷണല് മജിസ്ട്രേറ്റിന് അധികാരം നല്കിയിട്ടുണ്ട്. ശരീരത്തില് നിന്ന് കണ്ടെടുത്ത ഭൗതിക വസ്തുക്കള് സംബന്ധിച്ചും ആവശ്യമായ നടപടികള് എസ്.ഡി.എമ്മിന് പുറപ്പെടുവിക്കാം.
