കണ്ണൂര്: മുന് എഡിഎം നവീന് ബാബുവിന്റെ ആത്മഹത്യയില് പ്രതിയായ കണ്ണൂര് മുന് ജില്ലാ പഞ്ചായത്ത് പ്രസിഡന്റ് പി.പി ദിവ്യയെ പൊലിസ് കസ്റ്റഡിയില്വിട്ട് കോടതി. വൈകീട്ട് അഞ്ച് മണിവരെയാണ് ദിവ്യയെ കസ്റ്റഡിയില് വിട്ടത്.
വൈകിട്ട് അഞ്ച് മണിക്ക് ദിവ്യയെ തിരികെ കോടതിയില് ഹാജരാക്കണമെന്ന് തലശ്ശേരി പ്രിന്സിപ്പല് സെഷന്സ് കോടതി വ്യക്തമാക്കി. രണ്ട് ദിവസത്തേക്കാണ് ദിവ്യയെ പൊലിസ് കസ്റ്റഡിയില് ആവശ്യപ്പെട്ടത്.
നേരത്തെ കസ്റ്റഡിയിലെടുത്തശേഷം മൂന്നു മണിക്കൂറോളം ദിവ്യയെ ചോദ്യം ചെയ്തിരുന്നു. എന്നാല് ചോദ്യം ചെയ്യലില് കാര്യമായ വിവരങ്ങള് ലഭിക്കാത്തതിനാല്, കസ്റ്റഡിയില് വിശദമായ ചോദ്യം ചെയ്യല് വേണമെന്നാണ് പൊലീസ് അപേക്ഷയില് വ്യക്തമാക്കിയിരുന്നത്.
അതിനിടെ ജിവ്യയുടെ ജാമ്യ ഹർജി ഇന്ന് തലശേരി കോടതി പരിഗണിക്കും. ഹർജിയില് നവീന് ബാബുവിന്റെ ഭാര്യ മഞ്ജുഷ കക്ഷി ചേരും. കോടതി മുന്കൂര് ജാമ്യ ഹർജി തള്ളിയതിനു പിന്നാലെയാണ് കഴിഞ്ഞദിവസം ദിവ്യ അന്വേഷണ സംഘത്തിന് മുന്നില് കീഴടങ്ങിയത്. 14 ദിവസത്തേക്ക് റിമാന്ഡ് ചെയ്യപ്പെട്ട ദിവ്യ പള്ളിക്കുന്ന് വനിതാ ജയിലിലാണ് കഴിഞ്ഞിരുന്നത്.
