ജപ്പാനിലെ കാർഷിക പരിശീലന പരിപാടിയിലേക്ക് അപേക്ഷ ക്ഷണിച്ചു

കോഴിക്കോട്: ഓയിസ്ക ഇന്റർനാഷണൽ സൗത്ത് ഇന്ത്യ ചാപ്റ്ററിന്റെ ആഭിമുഖ്യത്തിൽ 2027-ലെ ജപ്പാൻ കാർഷിക പരിശീലന പരിപാടിയിലേക്ക് യോഗ്യരായ യുവാക്കളിൽ നിന്ന് അപേക്ഷകൾ ക്ഷണിച്ചു.ജപ്പാനിലെ ആധുനിക കാർഷിക രീതികൾ നേരിട്ട് പഠിക്കാനും പ്രായോഗിക പരിശീലനം നേടാനും അവസരമൊരുക്കുന്ന ഈ അന്തർദേശീയ പരിശീലന പദ്ധതി യുവജനങ്ങൾക്ക് മികച്ച ഭാവി സാധ്യതകൾ തുറന്നുകൊടുക്കുന്നതാണ്.
പരിശീലനം 24 മാസത്തെയും 14 മാസത്തെയും കോഴ്സുകളായി ലഭ്യമാണ്. തിരഞ്ഞെടുക്കപ്പെടുന്ന ഉദ്യോഗാർത്ഥികൾക്ക് ജപ്പാനിലേക്ക് യാത്രതിരിക്കുന്നതിന് മുമ്പ് അടിസ്ഥാന ജാപ്പനീസ് ഭാഷാ പരിശീലനവും നൽകും. അടുത്ത ബാച്ചിന്റെ യാത്ര 2027 ഫെബ്രുവരിയിൽ നിശ്ചയിച്ചിരിക്കുന്നു.2001-ൽ ഈ പദ്ധതി ആരംഭിച്ചതിനുശേഷം ഓയിസ്ക സൗത്ത് ഇന്ത്യ ചാപ്റ്റർ മുഖേന 37 യുവാക്കളെ ജപ്പാനിലേക്ക് കാർഷിക പരിശീലനത്തിനായി അയച്ചിട്ടുണ്ട്. പരിശീലനം പൂർത്തിയാക്കി മടങ്ങിയെത്തിയ പലരും മാതൃകാ കർഷകരായും കാർഷിക സംരംഭകരായും പരിശീലകരായും പ്രവർത്തിച്ച് ഇന്ത്യൻ കർഷക സമൂഹത്തിന് വിലപ്പെട്ട സേവനങ്ങൾ നൽകിവരുന്നു.
അപേക്ഷകർ പ്ലസ് ടു അല്ലെങ്കിൽ ഏതെങ്കിലും വിഷയത്തിൽ ബിരുദം നേടിയവരായിരിക്കണം. കൃഷിയോടും കാർഷിക മേഖലയോടും താൽപര്യമുള്ളവരും കൃഷിയിടങ്ങളിൽ പ്രവർത്തിക്കാൻ ശാരീരികമായി ആരോഗ്യമുള്ളവരുമായിരിക്കണം.തിരഞ്ഞെടുക്കപ്പെടുന്ന പരിശീലിതർക്ക് സൗജന്യ താമസസൗകര്യം, ഭക്ഷണം, പ്രതിമാസം ഏകദേശം 30,000 ജാപ്പനീസ് യെൻ സ്റ്റൈപ്പൻഡ് എന്നിവ ലഭിക്കും. എന്നാൽ അന്തർദേശീയ വിമാനയാത്രാ ചെലവ് ഉദ്യോഗാർത്ഥികൾ തന്നെ വഹിക്കേണ്ടതാണ്.
ഇന്ത്യയിലെ കാർഷിക വികസനത്തിനും സുസ്ഥിര കൃഷിരീതികളുടെ പ്രചാരണത്തിനും നേതൃത്വം നൽകാൻ കഴിയുന്ന യുവ കാർഷിക പ്രവർത്തകരെ വളർത്തിയെടുക്കുക എന്നതാണ് പദ്ധതിയുടെ പ്രധാന ലക്ഷ്യമെന്ന് ഓയിസ്ക ഭാരവാഹികൾ അറിയിച്ചു.അപേക്ഷ സമർപ്പിക്കേണ്ട അവസാന തീയതി: 2026 ജൂൺ 30 കൂടുതൽ വിവരങ്ങൾക്കും അപേക്ഷാഫോമിനും താൽപര്യമുള്ളവർ ഓയിസ്ക ഇന്റർനാഷണൽ സൗത്ത് ഇന്ത്യ ചാപ്റ്ററുമായി ബന്ധപ്പെടാവുന്നതാണ്.
– ഓയിസ്ക ഇന്റർനാഷണൽ സൗത്ത് ഇന്ത്യ ചാപ്റ്റർ, UKS റോഡ്, കോഴിക്കോട് 673001. ഫോൺ : +917736815812