കൊച്ചി:തന്റെ കൈവശം ആകെ അഞ്ച് ജോഡി ആനക്കൊമ്പുകളുണ്ടെന്ന് നടൻ മോഹൻലാൽ വനംവകുപ്പിനെ അറിയിച്ചതായി മലയാറ്റൂർ ഡിവിഷണൽ ഫോറസ്റ്റ് ഓഫീസർ (ഡിഎഫ്ഒ) കാർത്തിക് അറിയിച്ചു.
ഇതിൽ മുമ്പ് രേഖകളിലില്ലാത്ത മൂന്ന് ജോഡി ആനക്കൊമ്പുകളെക്കുറിച്ചുള്ള വിവരങ്ങളാണ് പുതുതായി വെളിപ്പെടുത്തിയിരിക്കുന്നത്.
പുതുതായി വെളിപ്പെടുത്തിയ മൂന്ന് ജോഡി ആനക്കൊമ്പുകളുടെ ഉടമസ്ഥാവകാശം, ലഭിച്ച സാഹചര്യങ്ങൾ, കൈവശം സൂക്ഷിക്കുന്നതിനുള്ള രേഖകൾ എന്നിവ ഹാജരാക്കാൻ മോഹൻലാലിന് നിർദേശം നൽകിയതായി ഡിഎഫ്ഒ വ്യക്തമാക്കി.
വനംവകുപ്പ് ആവശ്യപ്പെട്ട വിവരങ്ങൾ പരിശോധിച്ച ശേഷമാകും തുടർനടപടികൾ സ്വീകരിക്കുക.
അതേസമയം, ആനക്കൊമ്പുകൾ തനിക്ക് വിവിധ അവസരങ്ങളിൽ സമ്മാനമായി ലഭിച്ചതാണെന്നാണ് മോഹൻലാൽ വനംവകുപ്പിനെ അറിയിച്ചിരിക്കുന്നത്.
സമ്മാനമായി ലഭിച്ച ആനക്കൊമ്പുകൾ നിയമാനുസൃതമായി കൈവശം വയ്ക്കുന്നതുമായി ബന്ധപ്പെട്ട രേഖകളും വിശദാംശങ്ങളും സമർപ്പിക്കണമെന്നാണ് അധികൃതർ ആവശ്യപ്പെട്ടിരിക്കുന്നത്.
വന്യജീവി സംരക്ഷണ നിയമപ്രകാരം ആനക്കൊമ്പുകൾ പോലുള്ള വന്യജീവി ഉൽപ്പന്നങ്ങൾ കൈവശം സൂക്ഷിക്കുന്നതിന് നിശ്ചിത വ്യവസ്ഥകളും രേഖകളും ആവശ്യമാണ്.
അതിനാൽ മോഹൻലാൽ സമർപ്പിക്കുന്ന രേഖകൾ വിശദമായി പരിശോധിച്ച ശേഷമേ ഇക്കാര്യത്തിൽ അന്തിമ തീരുമാനമെടുക്കൂവെന്ന് വനംവകുപ്പ് അധികൃതർ അറിയിച്ചു.
