മദ്യനയ കേസില് അറസ്റ്റിലായി ജയിലില് കഴിയുന്ന മുഖ്യമന്ത്രി അരവിന്ദ് കെജ്രിവാള് പ്രമേഹം കൂട്ടാനായി മാമ്പഴവും മധുരവും കഴിക്കുന്നെന്ന് ഇഡി. പ്രമേഹ രോഗിയായ കെജ്രിവാള് രക്തത്തിലെ പഞ്ചസാരയുടെ അളവ് കൂട്ടി ആരോഗ്യ കാരണങ്ങള് ചൂണ്ടിക്കാട്ടി ജാമ്യം കിട്ടാന് വേണ്ടിയാണിതെന്നും ഇ.ഡി കോടതിയെ അറിയിച്ചു.
ഇതോടെ കെജ്രിവാളിന് ജയിലില് നല്കുന്ന ഭക്ഷണവുമായി ബന്ധപ്പെട്ട വിശദാംശങ്ങള് കോടതി, ഇഡിയോട് തേടി. ഇത് സംബന്ധിച്ച വിവരങ്ങള് ഇഡി സമര്പ്പിച്ചുവെന്നാണ് സൂചന. വീഡിയോ കോൺഫറൻസിലൂടെ ഡോക്ടറെ കാണാനുള്ള സൗകര്യവും ദിവസവും പ്രമേഹം പരിശോധിക്കാനുള്ള സൗകര്യവും നല്കണമെന്നാവശ്യപ്പെട്ട് കെജ്രിവാള് സമര്പ്പിച്ച ഹർജി പരിഗണിക്കുകയായിരുന്നു കോടതി. ഹർജി വീണ്ടും നാളെ പരിഗണിക്കും.
