കോഴിക്കോട്: താമരശേരി ഉണ്ണിക്കുളം പഞ്ചായത്തിലെ ചോയിരം വാർഡിൽ കാരമ്മൽ മംഗലത്ത് ജനവാസ മേഖലയിൽ മൊബൈൽ ടവർ സ്ഥാപിക്കാനുള്ള നീക്കം തടയണമെന്ന പരാതിയിൽ മനുഷ്യാവകാശ കമ്മീഷൻ കേസെടുത്ത് ജില്ലാ കളക്ടർക്ക് നോട്ടീസയച്ചു.
15 ദിവസത്തിനകം റിപ്പോർട്ട് സമർപ്പിക്കണം. ഒക്ടോബർ 29 ന് കോഴിക്കോട് ഗവ.ഗസ്റ്റ് ഹൗസിൽ നടക്കുന്ന സിറ്റിംഗിൽ ജുഡീഷ്യൽ അംഗം കെ. ബൈജുനാഥ് കേസ് പരിഗണിക്കും.
നിലവിൽ മൊബൈൽ ഫോണുകൾക്ക് മികച്ച സിഗ്നൽ ലഭിക്കുന്ന സ്ഥലത്ത് പുതിയ ടവറിന്റെ ആവശ്യമില്ലെന്ന് പരാതിക്കാർ അറിയിച്ചു. രോഗികളും സ്ത്രീകളും തിങ്ങിപാർക്കുന്ന സ്ഥലത്ത് സ്വകാര്യ മൊബൈൽ കമ്പനി സ്ഥാപിക്കാൻ ഉദ്ദേശിക്കുന്ന മൊബൈൽ ടവറിന്റെ നിർമ്മാണം തടയണമെന്നാണ് നാട്ടുകാരുടെ ആവശ്യം. പ്രദേശവാസികൾക്ക് വേണ്ടി സി.പി. അബ്ദുൾ മജീദും എ. മൻസൂറുമാണ് കമ്മീഷനെ സമീപിച്ചത്.
