കൊയിലാണ്ടി: പൂക്കാട് നായിബ് സുബേദാര്‍ എം ശ്രീജിത്തിന് വീട്ടില്‍ സ്മൃതി മണ്ഡപം ഒരുങ്ങി,റിപ്പബ്ലിക് ദിനത്തില്‍ എന്‍സിസി ജി.പി. കോഴിക്കോട് കമാന്‍ഡര്‍ ബ്രിഗേഡിയര്‍ ഇ. ഗോവിന്ദ് സ്മൃതി മണ്ഡപം സമര്‍പ്പിച്ചു. ശ്രീജിത്തിന്റെ ഛായാപടം ചേമഞ്ചേരി ഗ്രാമ പഞ്ചായത്ത് പ്രസിഡണ്ട് സതി കിഴക്കയില്‍ അനാവരണം ചെയ്തു. അച്ഛന്‍ വത്സനും അമ്മ ശോഭയും ഭാര്യ ഷജിനയും മക്കളായ അതുല്‍ജിത്തും തന്‍മയ ലക്ഷ്മിയും ചേര്‍ന്ന് വിളക്ക് കൊളുത്തി പുഷ്പങ്ങള്‍ സമര്‍പ്പിച്ചു.
രാജ്യത്തിനുവേണ്ടി സ്വന്തം ജീവന്‍ നല്‍കിയ മകന്റെ പിതാവായതില്‍ അഭിമാനമുണ്ടെന്നും രാജ്യം മകനെ ആദരിച്ചതില്‍ ഏറെ നന്ദിയുണ്ടെന്നും ശ്രീജിത്തിന്റെ അച്ഛന്‍ വത്സന്‍ പറഞ്ഞു. ഭര്‍ത്താവിന് ശൗര്യചക്ര ലഭിച്ചതില്‍ അഭിമാനമുണ്ടെന്ന് ഭാര്യ ഷജിനും പറഞ്ഞു.
2021 ജൂലൈ എട്ടിനാണ് കശ്മീരിലെ രജൗരി ജില്ലയിലെ സുന്ദര്‍ബനി സെക്ടറില്‍ പാക് ഭീകരരുടെ നുഴഞ്ഞുകയറ്റം തടയുന്നതിനിടയില്‍ ശ്രീജിത്ത് വീരമൃത്യുവരിച്ചത്. നാല്‍പ്പത്തി രണ്ടാം വയസ്സിലാണ് ശ്രീജിത്ത് കണ്ണീരോര്‍മയായത്. സര്‍വീസിലിരിക്കെ സേനാമെഡലും ശ്രീജിത്തിന് ലഭിച്ചിരുന്നു. രാഷ്ട്രപതിയുടേതുള്‍പ്പെടെ 23 പുരസ്‌കാരങ്ങളും നേടിയിരുന്നു. ശത്രുസേനയുടെ മുനയൊടിക്കുന്നതില്‍ ശ്രീജിത്ത് എന്നും മുന്നിലായിരുന്നു. 20 വര്‍ഷം മുമ്പ് കന്യാകുമാരി സ്വദേശി ഡേവിഡ് രാജുവിനോടൊപ്പം ചേര്‍ന്ന് റോക്കറ്റ് ലോഞ്ചര്‍ ഉപയോഗിച്ച് ബോംബ് വര്‍ഷിച്ച് മൂന്ന് പാക് ഭീകരരെ അദ്ദേഹം വധിച്ചു.
ഐക്യരാഷ്ട്ര സംഘടനയുടെ ദൗത്യഭാഗമായുള്ള ഇന്ത്യന്‍ സൈനിക സംഘത്തില്‍ അംഗമായിരുന്നു. വീരമൃത്യുവരിക്കുന്നതിന് മുന്നുമാസം മുമ്പാണ് നായിബ് സുബേദാര്‍ ആയി സ്ഥാനക്കയറ്റം ലഭിച്ചത്. രാജ്യരക്ഷക്കായി അദ്ദേഹം അനുഷ്ഠിച്ച പ്രവര്‍ത്തനങ്ങള്‍ പരിഗണിച്ചാണ് റിപ്പബ്ലിക് ദിനത്തില്‍ ശൗര്യചക്രയെന്ന ഉന്നത സൈനിക ബഹുമതി നല്‍കാന്‍ തീരുമാനിച്ചത്.
ചടങ്ങില്‍ ചേമഞ്ചേരി ഗ്രാമ പഞ്ചായത്ത് പ്രസിഡന്റ് സതി കിഴക്കയില്‍ അധ്യക്ഷത വഹിച്ചു. അനുസ്മരണ സമിതി കണ്‍വീനര്‍ മാടഞ്ചേരി സത്യനാഥന്‍ സ്വാഗതം പറഞ്ഞു. ചടങ്ങിന് ആശംസകള്‍ നേര്‍ന്ന് കൊണ്ട് ഗ്രാമ പഞ്ചായത്തു മെമ്പര്‍ വത്സല പുല്ല്യത്ത്, കലിക്കറ്റ് സൈനിക കൂട്ടായ്മ പ്രസിഡണ്ട് ക്യാപ്റ്റന്‍ നന്ദന്‍ കരുമല തുടങ്ങിയവര്‍ സംസാരിച്ചു. രതീഷ് ഈച്ചരോത്ത് ചടങ്ങിന് നന്ദി പ്രകാശിപ്പിച്ചു. ശിവദാസ് ചേമഞ്ചേരി, സുനില്‍ തിരുവങ്ങൂര്‍, അച്യുതന്‍ ചേമഞ്ചേരി എന്നിവര്‍ ചേര്‍ന്നവതരിപ്പിച്ച ദേശഭക്തി ഗാനാലാപനവും ചടങ്ങിന് മിഴിവേകി. ശ്രീജിത്ത് എം അനുസ്മരണ സമിതി ചേമഞ്ചേരിയും കലിക്കറ്റ് സൈനിക കൂട്ടായ്മയും സംയുക്തമായാണ് ചടങ്ങുകള്‍ സംഘടിപ്പിച്ചത്.
