ക്ഷീണം വന്നാൽ ഇളനീര് കുടിക്കാൻ ഇറങ്ങുന്നവരാണ് പലരും. എന്നാൽ ശരീരത്തിൽ ജലാംശം നിലനിർത്താൻ പ്രകൃതിദത്തമായ പാനീയമായ ഇളനീരാണോ അതോ വൈദ്യശാസ്ത്രപരമായി തയ്യാറാക്കിയ ഒ.ആർ.എസ്സാണോ കൂടുതൽ നല്ലതെന്ന കാര്യത്തിൽ പലർക്കും സംശയമുണ്ട്. ഓരോന്നിനും അതിന്റേതായ ഗുണങ്ങളുണ്ടെന്നും സാഹചര്യത്തിനനുസരിച്ചാണ് ഇവ തിരഞ്ഞെടുക്കേണ്ടതെന്നും ആരോഗ്യ വിദഗ്ധർ ചൂണ്ടിക്കാട്ടുന്നു.
ഇളനീരിന്റെ ഗുണങ്ങൾ:
ഇളനീർ പൊട്ടാസ്യം, മഗ്നീഷ്യം, കാൽസ്യം, വിറ്റാമിൻ സി, അമിനോ ആസിഡുകൾ, ആന്റിഓക്‌സിഡന്റുകൾ എന്നിവയാൽ സമ്പന്നമാണ്. ഇത് ഹൃദയാരോഗ്യത്തിന് നല്ലതാണ്. ലഘുവായ വ്യായാമത്തിന് ശേഷം ശരീരത്തിന് ഉന്മേഷം നൽകാനും ചൂടുള്ള കാലാവസ്ഥയിൽ സാധാരണ നിലയിൽ ജലാംശം നിലനിർത്താനും ദിവസേനയുള്ള പാനീയമായി ഉപയോഗിക്കാനും ഇളനീർ മികച്ചതാണ്
ഒ.ആർ.എസ്സിന്റെ പ്രാധാന്യം:
ലോകാരോഗ്യ സംഘടന ശാസ്ത്രീയമായി രൂപപ്പെടുത്തിയ ഒന്നാണ് ഒ.ആർ.എസ്. ഇത് ഗ്ലൂക്കോസ്, സോഡിയം, പൊട്ടാസ്യം എന്നിവ കൃത്യമായ അളവിൽ സംയോജിപ്പിച്ച് നിർമ്മിച്ചതാണ്. അതിസാരം, ഛർദ്ദി, പനി, കഠിനമായ വിയർപ്പ് എന്നിവ മൂലമുണ്ടാകുന്ന നിർജ്ജലീകരണം പരിഹരിക്കാൻ ഒ.ആർ.എസ് ആണ് നല്ലത്.
ശരീരത്തിലെ ലവണാംശം വേഗത്തിൽ വീണ്ടെടുക്കാനും വൃക്ക സംബന്ധമായ പ്രശ്നങ്ങളും ഷോക്കും ഒഴിവാക്കാനും ഇത് സഹായിക്കുന്നു. രോഗാവസ്ഥകളിൽ ഉണ്ടാകുന്ന നിർജ്ജലീകരണം തടയാൻ ഇളനീരിന് കഴിയില്ല, കാരണം അതിൽ ആവശ്യത്തിന് സോഡിയം അടങ്ങിയിട്ടില്ല. ഇളനീർ ആരോഗ്യകരമാണെങ്കിലും ചിലർ ഇത് ഉപയോഗിക്കുമ്പോൾ ശ്രദ്ധിക്കണം. പ്രത്യേകിച്ച്:
വൃക്ക സംബന്ധമായ രോഗങ്ങളുള്ളവരും ശരീരത്തിൽ പൊട്ടാസ്യത്തിന്റെ അളവ് കൂടുതലുള്ളവരും.
സാധാരണ ദാഹം മാറ്റാനും ആരോഗ്യത്തിനുമായി ഇളനീർ ഉപയോഗിക്കാം. എന്നാൽ രോഗങ്ങൾ മൂലമുണ്ടാകുന്ന കഠിനമായ ജലനഷ്ടം പരിഹരിക്കാൻ ഒ.ആർ.എസ് തന്നെയാണ് ഉത്തമം. പാക്കറ്റിൽ വരുന്ന ഇളനീരിനേക്കാൾ ഫ്രഷ് ആയ ഇളനീർ കുടിക്കുന്നതാണ് കൂടുതൽ ഗുണകരം. കൂടുതൽ വിവരങ്ങൾക്കായി എപ്പോഴും ഒരു ഡോക്ടറുടെ ഉപദേശം തേടുക
