കോഴിക്കോട്: ജപ്പാനിലേക്ക് ഉപരിപഠനത്തിനും തൊഴിലിനും പോകുന്ന 35 വിദ്യാർഥികൾക്ക് സ്നേഹാദരം നൽകി നഗരം. ഇന്നലെ (ശനി) രാവിലെ നടക്കാവ് ഈസ്റ്റ് അവന്യൂ ഹോട്ടലിൽ നടന്ന ചടങ്ങിലാണ് ജാപ്പനീസ് ലാംഗ്വേജ് അക്കാദമിയുടെ നേതൃത്വത്തിൽ വിദ്യാർഥികളെ ആദരിച്ചത്. ഓയിസ്ക ഇന്‍റർനാഷണൽ ഡെപ്യൂട്ടി സെക്രട്ടറി ജനറൽ അരവിന്ദ് ബാബു ചടങ്ങ് ഉദ്ഘാടനം ചെയ്തു.
ഇതോടെ, ജാപ്പനീസ് ലാംഗ്വേജ് അക്കാദമി വഴി ഈ വർഷം ജപ്പാനിലേക്കു പോകുന്നവരുടെ എണ്ണം 65 ആയി. രാജ്യത്തുനിന്ന് ഇത്രയും വിദ്യാർഥികൾ ഒരു വർഷം ജപ്പാനിലേക്കു പോകുന്നത് ഇതാദ്യം.
മുഴുവൻ വിദ്യാർഥികളും സ്കോളർഷിപ്പോടെയാണ് ജപ്പാനിലേക്കു പോകുന്നത്. നാലുപേർക്ക് ഒരു വർഷത്തെ പഠനവും തുടർന്ന് അഞ്ചുവർഷത്തേക്കു ജോലിയും വാഗ്ദാനം ചെയ്യുന്ന കരാറും ലഭിക്കും. ഇവരുടെ വിമാന ടിക്കറ്റ് ഉൾപ്പെടെ ചെലവുകൾ ജെഎൽഎ വഹിക്കും.
ജെഎൽഎ എംഡി ഡോ. സുബിൻ വാഴയിൽ ചടങ്ങിൽ അധ്യക്ഷത വഹിച്ചു. മാധ്യമ പ്രവർത്തകൻ ഫിറോസ് ഖാൻ , ബാലു തുടങ്ങിയവർ സംസാരിച്ചു.
