മക്കട ദേവദാസ്​; സംവിധായകരുടെ മനസ്സറിഞ്ഞ കലാപ്രതിഭ

കോഴിക്കോട്: സംവിധായകരുടെ മനസ്സറിഞ്ഞ കലാപ്രതിഭയായിരുന്നു ഇന്ന് അന്തരിച്ച പ്രശസ്ത കലാസംവിധായകന്‍ മക്കട ദേവദാസ്. നൂറോളം ചിത്രങ്ങളുടെ കലാ സംവിധാനം നിര്‍വ്വഹിച്ച അദ്ദേഹം 300പരം ചിത്രങ്ങളുടെ ടൈറ്റിലും അണിയിച്ചൊരുക്കി.
സിനിമയിൽ പ്രവർത്തിക്കണമെന്ന​ മോഹവുമായി ആർടിസ്​റ്റ്​ നമ്പൂതിരിയുടെ കത്തുമായാണ് മക്കട ദേവദാസ്​ മദ്രാസിന്​ വണ്ടികയറിയത്​. കാലിക്കറ്റ്​ സർവകലാശാലയിൽ പെയിന്റിങ്ങിൽ വിജയം നേടിയതും എരഞ്ഞിപ്പാലത്ത്​ ശ്രീകല സ്​റ്റുഡിയോയിലെ പരിചയവുമെല്ലാം അദ്ദേഹത്തിലെ മോഹത്തിന്​ വിത്ത്​ പാകി. സ്വയം വരം സിനിമയുടെ പിന്നണിയിലുണ്ടായിരുന്ന രമേശിനാണ് നമ്പൂതിരി കത്ത് നൽകിയത്​. മദ്രാസിലെത്തിയപ്പോൾ ചെമ്മീൻ സിനിമയുടെ വസ്​ത്രാലങ്കാരം നടത്തിയ രാമചന്ദ്ര​നെ കണ്ടുമുട്ടി. ദേവദാസിനെ അദ്ദേഹം സംവിധായകൻ പി എൻ മേനോ​ന്റെ വീട്ടിലെത്തിച്ചു. ഒരു സിനിമയുടെ ടൈറ്റിൽ എഴുതിയതോടെ മേനോന്‍ ദേവദാസിനെ ഒപ്പംകൂട്ടി. അങ്ങിനെ സിനിമയിലെ കലാ സംവിധാനം കണ്ടും ചെയ്​തും പഠിച്ചു. മൂന്ന്​ വർഷം മോനോ​ന്റെ ശിഷ്യനായി പോസ്​റ്റർ ഡിസൈനിങ്​ രംഗത്ത്​ പ്രവർത്തിച്ചു. മധുവി​ന്റെ ഉമാസ്​റ്റുഡിയോയായിരുന്നു പരിശീലനക്കളരി. പിന്നീട്​ കലാ സംവിധായകൻ എസ്​ കൊന്നനാട്ടി​നൊപ്പം അദ്ദേഹത്തിന്റെ വീട്ടിലായി ദേവദാസിന്റെ താമസം. ഹരിഹര​ന്റെ ‘പഞ്ചമി’യുടെ ടൈറ്റിൽ എഴുതിയതോടെ ചലച്ചിത്ര രംഗത്ത്​ ദേവദാസി​ന്റെ സ്​ഥാനം ഉറച്ചു. എഴുതിയും പെയിന്റ്​ ചെയ്​തും തയ്യാക്കുന്ന ടൈറ്റിലുകൾ കാമറയിൽ പകർത്തുകയാണ്​ അന്നത്തെ രീതി. ഒരു സിനിമക്ക്​ 40 ൽകുറയാതെ ടൈറ്റിൽ ബോർഡുകൾ വേണ്ടി വരും. ഒരു ബോർഡിന്​ ആദ്യകാലത്ത്​ 10 രൂപ പ്രതിഫലമായിരുന്നു. പിന്നീട്​ 50 രൂപ വരെയായി. അന്നത്തെ നല്ല ശമ്പളം. തമിഴും മലയാളവുമടക്കം 300 ഓളം പടങ്ങളുടെ ടൈറ്റിൽ എഴുതി. കലാസംവിധാനത്തി​ന്റെ വിവിധ പാഠങ്ങൾ കൊന്നനാട്ടിൽ നിന്ന്​ പഠിച്ചു.
പി ചന്ദ്രകുമാറി​ന്റെ ‘നീയോ ഞാനോ’ എന്നസിനിമയിലാണ്​ ദേവദാസ്​ ആദ്യമായി സ്വതന്ത്ര കലാ സംവിധായകനാവുന്നത്​. തുടര്‍ന്ന് പത്മരാജന്റെ ‘കള്ളൻ പവിത്രൻ’, പി ചന്ദ്രകുമാറി​ന്റെ ‘തടവറ’, കുയിലിനെ തേടി, പ്രേം പൂജാരി, കാവൽമാടം, തിങ്കളാഴ്​ച നല്ലദിവസം, അയനം, ബ്രഹ്​മരക്ഷസ്​, തുമ്പോളികടപ്പുറം, സന്ധ്യ​ക്കെന്തിന്​ സിന്ദൂരം, മലമുകളിലെ ദൈവം, കടമ്പ, വധു ഡോക്​ടറാണ്​, സുവർണ്ണ സിംഹാസനം തുടങ്ങി ശ്രദ്ധേയമായ നൂറോളം സിനിമക്ക്​ കലാ സംവിധാനമൊരുക്കി. തമിഴിൽ കാർത്തിക്കും നന്ദിനിയും അഭിനയിച്ച ‘മനതിൽ’ എന്ന പടത്തിനും കലാസംവിധാനമൊരുക്കി. നിവധി ടെലി സീരിയലുകൾക്കും കലാസംവിധാനമൊരുക്കിയിരുന്നു. സുൽത്താൻ വീടിന്​ സംസ്​ഥാന ടെലിവിഷൻ അവാർഡ്​ ലഭിച്ചിരുന്നു.