പാലക്കാട് കഞ്ചിക്കോട് തിരുവനന്തപുരം – ചെന്നൈ മെയിൽ ട്രെയിൻ തട്ടി കാട്ടാന ചരിഞ്ഞു. 35 വയസുള്ള പിടിയാനയാണ് ചരിഞ്ഞത്. സംഭവത്തില്‍ ലോക്കോ പൈലറ്റിനെതിരെ വനം വകുപ്പ് കേസെടുത്തു. ട്രെയിനിൻ്റെ വേഗത അപകടത്തിന് ഇടയാക്കിയെന്ന പ്രാഥമിക നിഗമനത്തിലാണ് കേസെടുത്തത്. രാത്രി 12 മണിയോടെയാണ് അപകടം.
ആനയുടെ തലയ്ക്കേറ്റ പരുക്കാണ് മരണകാരണമെന്ന് കരുതുന്നതായി സിസിഎഫ് വിജയാനന്ദ് പറഞ്ഞു. രാവിലെ എട്ട് മണിയോടെ ആനയുടെ പോസ്റ്റ്മോർട്ടം നടപടികൾ തുടങ്ങും. ഒരു മാസത്തിനിടെ വാളയാർ കഞ്ചിക്കോട് റൂട്ടിലെ രണ്ടാമത്തെ അപകടമാണിത്. കഴിഞ്ഞമാസം ഈ ഭാഗത്ത് മറ്റൊരു കാട്ടാന തീവണ്ടിയിടിച്ച് ഗുരുതരമായി പരുക്കേറ്റിരുന്നു. പിന്നാലെ ചികിത്സയിലിരിക്കെ ഈ ആന ചരിഞ്ഞിരുന്നു.
