അന്താരാഷ്ട്ര യോഗാദിനാചരണത്തിന്റെ ഭാഗമായി എസ്.കെ. പൊറ്റക്കാട് ഹാളിൽ നടത്തിയ ‘യോഗാമഹോത്സവ്’ വനം വകുപ്പ് മന്ത്രി എ.കെ. ശശീന്ദ്രൻ ഉദ്ഘാടനം ചെയ്തു. മാനസിക- ശാരീരികാരോഗ്യത്തിന് ഫലപ്രദമായ വ്യായാമമായും ചികിത്സയായും കാണുന്ന യോഗയെ ജീവിതത്തിന്റെ ഭാഗമാക്കേണ്ടത് അനിവാര്യമാണെന്ന് മന്ത്രി പറഞ്ഞു.
ലോകത്താകമാനം യോഗ പരിശീലിക്കുന്ന ഇക്കാലത്ത് വെറുമൊരു ദിനാഘോഷത്തിൽ ഒതുങ്ങാതെ ഏവരും യോഗ പരിശീലിക്കണം. ശരീരത്തെയും ചിന്തകളെയും നിയന്ത്രിക്കാൻ കഴിയുന്ന ഒരു റിമോട്ട് കൺട്രോളർ ആയി യോഗ പരിവർത്തിക്കപ്പെട്ടു കഴിഞ്ഞു. മനുഷ്യജീവിതത്തിൽ ഏറെ സഹായകരമായ യോഗയെ ലോകം അംഗീകരിച്ചതിന്റെ ഭാഗമായാണ് ഇന്ത്യ മുന്നോട്ടുവെച്ച അന്തരാഷ്ട്ര യോഗാദിനമെന്ന ആശയത്തെ സാർവദേശീയമായി അംഗീകരിച്ചതെന്നും മന്ത്രി കൂട്ടിച്ചേർത്തു.
‘യോഗ മാനവരാശിക്ക്’ എന്ന സന്ദേശത്തോടെ നടത്തുന്ന എട്ടാമത് അന്താരാഷ്ട്ര യോഗ ദിനാചരണത്തിന്റെ ഭാഗമായി ഇന്ത്യയിലെ വിവിധയിടങ്ങളിലായി 75 കേന്ദ്രങ്ങളിൽ ‘യോഗമഹോത്സവ്’ നടത്തി. യോഗ പരിശീലനം ജനകീയമാക്കുകയെന്ന ലക്ഷ്യത്തോടെ ജില്ലയിൽ വിവിധ പദ്ധതികൾ ആവിഷ്കരിച്ചിട്ടുണ്ട്. നിലവിൽ നാഷണൽ ആയുഷ് മിഷനു കീഴിൽ 16 ഹെൽത്ത് ആൻഡ് വെൽനെസ്സ് സെന്ററുകൾ ജില്ലയിൽ പ്രവർത്തിച്ചു വരുന്നു.
ചടങ്ങിൽ തോട്ടത്തിൽ രവീന്ദ്രൻ എം.എൽ.എ അധ്യക്ഷത വഹിച്ചു. ജില്ലാ ആയുർവേദ ആശുപത്രിയിലെ യോഗ ആൻഡ് നാച്ചുറോപ്പതിക് വിഭാഗം ഡോ. യമുന യോഗാസനങ്ങൾ വിശദീകരിച്ചു. സ്പെഷ്യൽ ബ്രാഞ്ച് അസി. കമ്മീഷ്ണർ എ. ഉമേഷ്, ഭാരതീയ ചികിത്സാ വകുപ്പ് ജില്ലാ മെഡിക്കൽ ഓഫീസർ ഡോ. കെ.എ. മൻസൂർ, ഹോമിയോ വകുപ്പ് ജില്ലാ മെഡിക്കൽ ഓഫീസർ ഡോ. കവിത പുരുഷോത്തമൻ, ശുചിത്വ മഷൻ ജില്ലാ കോ- ഓഡിനേറ്റർ ഒ. ശ്രീകല, ജനപ്രതിനിധികൾ, വിവിധ വകുപ്പുകളിലെ ജീവനക്കാർ തുടങ്ങിയവർ പങ്കെടുത്തു. ജില്ലാ പഞ്ചായത്ത് പ്രസിഡന്റ് ഷീജ ശശി സ്വാഗതവും നാഷണൽ ആയുഷ് മിഷൻ ജില്ലാ പ്രോഗ്രാം മാനേജർ ഡോ. അനീന പി. ത്യാഗരാജ് നന്ദിയും പറഞ്ഞു.
