കോഴിക്കോട്: പ്രശ്‌നങ്ങള്‍ പരിഹരിച്ചില്ലെങ്കില്‍ എല്‍.ഡി.എഫ് മുന്നണി വിടുമെന്ന് കൊടുവള്ളി മുന്‍ എം.എല്‍.എ കാരാട്ട് റസാഖ്. മദ്രസാ ബോര്‍ഡ് ചെയര്‍മാന്‍ സ്ഥാനം രാജിവയ്ക്കാന്‍ തയ്യാറാണ്. തന്നെ പരാജയപ്പെടുത്താന്‍ ചിലര്‍ ശ്രമിച്ചു. എല്‍.ഡി.എഫിന് താന്‍ കൊടുത്ത കത്ത് പരിഗണിച്ചില്ലെങ്കില്‍ ഇടതുപക്ഷം വിടും. ഇനി കാത്തിരിക്കാന്‍ വയ്യ. സി.പി.എമ്മിന് ഒരാഴ്ച സമയം നല്‍കും. ഇല്ലെങ്കില്‍ മുന്നണി ഉപേക്ഷിക്കുമെന്നും റസാഖ് മാധ്യമങ്ങളോട് പറഞ്ഞു. അതേസമയം മുസ്‌ലിം ലീഗിലേക്ക് ഇനിയൊരു തിരിച്ചുപോക്കില്ലെന്നും അദ്ദേഹം വ്യക്തമാക്കി.
സി.പി.എമ്മിനും മുഖ്യമന്ത്രിക്കുമെതിരെയും രൂക്ഷ വിമര്‍ശനമാണ് അദ്ദേഹം നടത്തിയത്. മന്ത്രിയെന്ന നിലയില്‍ പി.എ മുഹമ്മദ് റിയാസിനെ അംഗീകരിക്കാനാവില്ലെന്ന് റസാഖ് തുറന്നടിച്ചു. പല പദ്ധതികളും റിയാസ് അട്ടിമറിച്ചെന്നും പല തവണ അദ്ദേഹത്തെ സമീപിച്ചിട്ടും അവഗണിക്കുകമാത്രമാണുണ്ടായതെന്നും റസാഖ് ആരോപിച്ചു. റിയാസ് സി.പി.എമ്മിനെ ഹൈജാക്ക് ചെയ്യുകയാണ്. റിയാസ് പല കാര്യങ്ങളിലും ബോധപൂര്‍വ്വം ഇപെടുന്നുണ്ടെന്നും റസാഖ് കുറ്റപ്പെടുത്തി. സി.പി.എം പ്രദേശിക നേതാക്കള്‍ തനിക്ക് എതിരെ നില്‍ക്കുകയാണ്. പ്രശ്‌നങ്ങള്‍ പരിഹരിക്കാന്‍ കാത്തിരിക്കുകയാണെന്നും റസാഖ് പറഞ്ഞു.
പി.വി അന്‍വര്‍ എംഎല്‍എ അടുത്ത സുഹൃത്താണ്. അദ്ദേഹത്തിന്റെ പാര്‍ട്ടിയായ ഡിഎംകെയില്‍ ചേരുന്നത് പരിഗണിക്കും. അന്‍വര്‍ തന്നെ പാര്‍ട്ടിയിലേക്ക് ക്ഷണിച്ചിട്ടുണ്ട്. അന്‍വറിനോട് കാത്തിരിക്കാനാണ് താന്‍ ആവശ്യപ്പെട്ടതെന്നും റസാഖ് വ്യക്തമാക്കി.
