കോഴിക്കോട്: അതിജീവനത്തിനായി പാഴ്‌വസ്തു വ്യാപാരികള്‍ സമരമുഖത്തേക്ക്. കേരള സ്‌ക്രാപ്പ് മര്‍ച്ചന്റ്‌സ് അസോസിയേഷന്‍ (കെ.എസ്.എം.എ) ജില്ലാ കമ്മറ്റിയുടെ ആഭിമുഖ്യത്തില്‍ ഒക്ടോബര്‍ 3ന് കലക്ടറേറ്റിലേക്ക് തൊഴില്‍ സംരക്ഷണ റാലി നടത്തും. രാവിവെ 10ന് നടക്കുന്ന റാലി കെ.എസ്എംഎ സംസ്ഥാന സെക്രട്ടറി കെ.പി. അഹമ്മദ് ഷെരീഫ് ഉദ്ഘാടനം ചെയ്യും. തുടര്‍ന്ന് കളക്ടര്‍ക്ക് അവകാശ പത്രികാ സമര്‍പ്പണം നടത്തും.
ആക്രി കച്ചവട മേഖലയെ ഉന്മൂലനം ചെയ്യുന്ന തരത്തിലുള്ള നടപടികളാണ് സംസ്ഥാന സര്‍ക്കാരും തദ്ദേശ സ്വയംഭരണ സ്ഥാപനങ്ങളും കൈക്കൊള്ളുന്നത്. പാഴ് വസ്തുക്കള്‍ കച്ചവടക്കാര്‍ എടുക്കാന്‍ പാടില്ലെന്ന നിബന്ധനയാണ് തദ്ദേശ സ്വയംഭരണ സ്ഥാപനങ്ങള്‍ മുന്നോട്ടു വയ്ക്കുന്നത്. എന്നാല്‍ ഇതു സംബന്ധിച്ച ഉത്തരവുകള്‍ ആവശ്യപ്പെടുമ്പോള്‍ കാണിക്കാന്‍ ഇവര്‍ തയ്യാറാകുന്നുമില്ല. ആക്രികള്‍ നടന്ന് ശേഖരിക്കുവര്‍, കച്ചവടക്കാര്‍, തൊഴിലാളികള്‍, റീസൈക്ലിംഗ് മേഖലയില്‍ പ്രവര്‍ത്തിക്കുന്നവര്‍ തുടങ്ങി സംസ്ഥാനത്ത് മൂന്ന് ലക്ഷത്തോളം പേര്‍ ഈ മേഖലയെ ആശ്രയിച്ചു ജീവിക്കുന്നവരാണ് .ഈ തൊഴില്‍ മേഖലയെ സംരക്ഷിച്ചു നിര്‍ത്തേണ്ടവരാണ് ഭരണാധികാരികള്‍. എന്നാല്‍ അവര്‍ തന്നെ ആ മേഖലയെ ഇല്ലാതാക്കാന്‍ ശ്രമിക്കുകയാണിവിടെ. കാലങ്ങളായി പാഴ്‌വസ്തുക്കള്‍ പൊതുജനങ്ങളില്‍ നിന്ന് കാശു നല്‍കി ശേഖരിച്ച് വില്‍പ്പന നടത്തി വരുന്നവരാണ് കേരളത്തിലെ സ്‌ക്രാപ്പ് കച്ചവടക്കാര്‍. നൂറ്റാണ്ടു മുമ്പ് പൂര്‍വ്വികര്‍ ചെയ്തു വന്നിരുന്ന തൊഴില്‍ പിന്തുടര്‍ന്നു വരുവരാണ് ഇവര്‍.
അജൈവ മാലിന്യ നിര്‍മ്മാര്‍ജ്ജനം അനായാസം നിര്‍വ്വഹിച്ചുകൊണ്ട് പരിസ്ഥിതിയെ സംരക്ഷിച്ചു നിര്‍ത്തുന്നതില്‍ ഗണ്യമായ പങ്കാണ് നാളിതുവരെ ഞങ്ങള്‍ വഹിച്ചു വന്നിരുന്നത്. എന്നാലിപ്പോള്‍ കാലങ്ങളായി ഞങ്ങള്‍ ചെയ്തു വന്നിരുന്ന സേവനങ്ങളെ വിസ്മരിച്ചു കൊണ്ട് പാഴ്‌വസ്തു വ്യാപാര മേഖലയെ തകര്‍ക്കുന്ന നിലപാടാണ് തദ്ദേശ സ്വയംഭരണ സ്ഥാപനങ്ങള്‍ കൈക്കൊള്ളുന്നതെന്ന് കെ.എസ്.എം.എ ജില്ലാ പ്രസിഡന്റ് പി.പി. മെഹബൂബ് പറഞ്ഞു. ഇത്തരം ദ്രോഹ നടപടികള്‍ക്കെതിരെ സംസ്ഥാന വ്യാപകമായി സ്‌ക്രാപ്പ് വ്യാപാരികള്‍ സമരമുഖത്താണ്. എല്ലാ ജില്ലാ ആസ്ഥാനങ്ങളിലും പ്രതിഷേധ സമരങ്ങള്‍ നടന്നു വരികയാണ്. ഒക്ടോബര്‍ എട്ടിന് സംസ്ഥാനത്തെ മൊത്തം പാഴ് വസ്തു വ്യാപാരികളും ചേര്‍ന്ന് നിയമസഭാ മാര്‍ച്ച് നടത്തും.
വാര്‍ത്താ സമ്മേളനത്തില്‍ കെ.എസ്.എം.എ ജില്ലാ പ്രസിഡന്റ് പി.പി.മെഹബൂബ്, സെക്രട്ടറി മുജ്മീര്‍.കെ, ട്രഷറര്‍ എസ്.വി. റഫീഖ്, സംസ്ഥാന കൗണ്‍സില്‍ അംഗം സി.മൊയ്തീന്‍ കോയ, സംസ്ഥാന എക്‌സിക്യുട്ടീവ് കമ്മറ്റിയംഗം
കെ.അര്‍ഫാത്ത് എന്നിവര്‍ പങ്കെടുത്തു.
